الخميس، 2 أكتوبر، 2014

كلمات عن الثورة – 35


- متفهم جدا ان حاجة تضايق ان حد يكون موظف حكومي و يقبض 100 الف الي مليون جنيه في الشهر و ينزل للحد الاقصي ........معلش نعيش عيشة الشعب العادي و ناخد 42 الف في الشهر .......عهد طبقة النبلاء و تحديد مرتبات للامراء انتهي .

- يا تري زمان ايام شجرة الدر و ايبك و خناقاتهم مع بعض و مع اقطاي اللي اكيد كان بيجي علي التعامل مع الشعب المصري ..........كان ساعتها لما الشعب المصري يسمع ان التتار جايين و اسقطوا الخلافة العباسية ، يا تري كانوا بيشمتوا و يقولوا كويس اهو نشوف فيهم يوم عن طريق التتار ؟؟؟؟؟؟؟؟؟

- علينا ان نفهم ان لا الدين و لا النوع و لا اللون و لا الاتجاه السياسي هو من يضمن اداء افضل في اي عمل .........العمل كفاءة و كفاية و اخلاص و ده ممكن يحصل من اي انسان دون تفريق ........العمل و جودته هو المقصد اذا اردنا الفايدة .

-  مرة واحد بيقولك : اصل تنفيذ الحد الاقصي في بعض القطاعات حيفتح باب الفساد ...........قوم احنا نعمل ايه نجمع كل الناتج المادي للفساد الممكن و نحوله لمرتب رسمي ..............اعتقد انه ولي زمن " إدي العيش لخبازه ولو ياكل تلات أرباعه".........

- الرجل صادق

- اقلب الصفحة و انتظر داعش و خليفتها في الصفحة التالية .

- مافيش حد بيفرح في اخواته و لو كان في منهم من خانه او زعله.

- طب احنا بتوع ضبط النفس ........الناس بتوع الجهاد و القرضاوي و كده راحوا فين ؟؟؟؟؟؟؟؟

-  ايه القصة اللي ممكن تتألف او تتحكي عن الانسان الشاطر او المحترم في تعاملاته ، ايه اللي ممكن يتقال عن الملتزم بالقانون ، ايه العقدة في الرواية لما ناس تحسن من نفسها او مستشفاتها او خدماتها العلاجية ...........لازم يكون هناك السيء انسانا او عملا لتكون هناك اثارة و عقدة و رواية ............لكل من شعر بالحزن من نشر صور قديمة عن م .العباسية ...........فهمتوا الامور مش كلها سامية في رواية و سينما و تلفزيون و فلوس .

-  ممكن تبقي ضد حماس لكن مش ضد الفلسطينين و لا مع اسرائيل
اذا كان المواجهات العسكرية ليست في صالح الامة الان .........علي الاقل هناك المجهود الدبلوماسي ......فين ايام الشجب ؟؟؟؟؟؟؟؟

-  حماس ليست كل فلسطين
و علي فلسطين مراجعة مواقف حماس بدقة ، لانها تفقدهم الكثير .






-  فلسطين امن قومي لمصر ........حتي لو عيال حماس بيقلوا ادبهم و يخونوا .

-  هل من حقك ان خضك واحد في الشارع ..........ان تقتله و تقتل اسرته / اسرائيل تقتل الفلسطينين.

- هل نري مزيد من الجفاء و القسوة و الميل للعدوانية و النصب و البجاحة ..........بعد ما مر به الناس في السنوات الاخيرة !!!!!!!!!!

- ما فيش حاجة اسمها حرب تمثيلية و يموت فيها ناس ...............زمان في "كلاب " قالوا اصل حرب اكتوبر تمثيلية علشان مصر تسلم بكامب ديفيد ...........لكن الحرب حرب ، الخلاف متي و اين و كيف .........اسرائيل تبيد الفلسطينين .

- ليس كل اسباب الفشل انت مسئول عنه ، و لكن انت مسئول عن احباطك و هو اهم اسباب استمرار الفشل ............

- التمثيل و ظاهرة كأن مدفوعة من النفاق الاجتماعي و الفساد و الاحتكار العلمي و الادبي و المادي و الواسطة و المحسوبية و تأليه المادة ..........ادي الي انهيار الارادة للعمل و التغيير .

- ممكن صواريخ حماس اللي بتعمل صوت تكون بتفزع الاسرائلين و بتطفش السياحة و بتخلي المستوطنين خايفين و هم بيزرعوا لكن ما سمعناش انها قتلت حد منهم .

-  الاكيد ان الهاون قتل مصرين في سيناء ........لكن الحق و الحقيقة لا المصرين حيفزعوا و لا يخافوا و كل تتري و لا كردي و لا حمساوي و لا اخواني و لا ارهابي موتور من مصر و كاره لها و لنفسه حيعرف مين المصرين و هم اللي عايزين يدوقوا ...........

- "الدم الغالي" بيكون في مزايدة عليه في بورصة الدماء تجارة للناس و القضايا و اعلام و افلام و مظاهرات تطالب بالقصاص .................اما " الدم الرخيص" بيهدر علي الاسفلت و الرملة من غير سمسرة و لا مزايدة و لا كلمة شكر او وفاء او ذكري ............

- في انتشار العلاج للامراض النفسية عن طريق الرقية الشرعية ..........

اذا كان الانسان يؤمن و يثق بقدرة الله علي الشفاء و يؤمن ان الدعاء باللسان الحر او بالقرأن او بالرقية كما ذكرت في السنة هي وسيلة للدعاء و الشفاء من الامراض النفسية او السحر ........... 1) فلماذا يقتصر الامر علي الامراض النفسية لعلاجها دون غيرها فالله القادر علي علاج المرض النفسي قادر بالتأكيد علي علاج غيره ، 2) لماذا يكون السحر و العمل في شكل امراض نفسية دون الاصابة بامراض اخري مثل الضغط و السكر و الروماتيزم .........الخ ، 3) و الدعاء كما نفهم ( بأي شكل) يقبله الله من الداع مباشرة دون الحاجة لوسيط في دعاء او معالج بالرقية الشرعية .................مهما كان الامر ثقافة ثابتة عند الناس في ازالة الامراض او السحر المسبب للامراض ، الا ان الامر يحتاج لمراجعة و مناقشة و بحث و توثيق ......

- في ناس عندها خلط بين الانسان و ما يؤمن به من قيم ...........هناك من يقع في اعمال غير ما يؤمن به او يعتقد به .........الاهم ان لا نكفر بالقيم و المباديء لان الانسان خطاء.

- بتفقع من السوداني و اليمني و السوري اللي بلادهم اتقسمت او في حرب اهلية و طريقها للتقسيم .........و يقولك اصل الديمقراطية اصل تطبيق الشريعة اصل الخلافة الاسلامية !!!!!!!!! يعني اعتبر بلدك حتة ( طين ) ارض سايبهالك ابوك ، كنت حتقسمها ؟؟؟؟؟؟؟؟,,,,,,,,وحدة ايه مع هذا التقسيم المتناثر للدول .

-  حكمة السلطة ...........اذا لم تستطع الانتصار عليك الاستمرار لتكون هناك فرصة للاستعداد مرة اخري .

- ياريت الانسان نفسيا يكون متكامل ........و لكن هذه مشكلته مفارقة بين الهوي و الفكر و السلوك اعدادا للاختبار و الاختيار .

- كنت فاكر نفسي ليبرال ، لقيتني بين الف قيد و قيد ............الانسان المعاصر .

-  كل واحد حيلبسوه اخطاء السنين ، و يقولوا اصل هو عسكري زي اللي قبله ؟؟؟؟؟؟؟......نتدخل في غزة ايه بس ، مش الاول نتدخل في مصر .......مش نبطل جنان و اوهام العظمة و نوفر اكل و شرب ، و لا الحماس و السفاهة حتخلينا نضيع !!!!!!!!!!!!!!

-  اهم نظم الادارة في مصر " لبس طقية ده لده" ............هو ليه مش حندخل في المشاكل و نحلها بحق و حقيقي ؟

- استباق و تضييع الفرص ........ان تري نفسك فقط فيما تريده احلامك و لا تتلمس قدراتك و امكانياتك و فرصك الانية و الحقيقية .........

-  و خطأ التخزين من عندنا و لا من عندهم ..........اصل صعب يبقي من عندنا لان المساعدات الدولية عليها اشراف من اطراف مختلفة و الا كل دولة تسمم الدول الاخري !!!!!!!!!!!!
= الموضوع ده بيفكرني بتسمم طلبة الازهر و تلزيقها في شيخ الازهر ايام مرسي .........نفس الحركات .

-  احنا لا نعمل تدويل لمعبر رفح و لا غيره .............احنا نخصخصه ( بطرس غالي ستايل )......

-  بحثوا عن الانسانية منذ قتل هابيل ،،،،،، و محاكم التفتيش .........حتي دنشواي ،،،،،، و التهجير و اللاجئين ..........و مدرسة بحر البقر ..... و قتل الاسري ............و صبرا و شاتيلا .......و قصف شعب فلسطين الاعزل .............بحثوا عنها لقوها في اعلانات و منظمات و لم يجدوها علي ارض الواقع .

-  مش قادرين يشوفوا في المدرسة غير شرح الدرس و السبورة ........و فاكرين ده التفوق .........و بعدين نقول اصل الدول التانية سبقتنا .........كويس ان الدول التانية سايبانا نعيش !!!!!!!!

-  الحكمة ليست في الدقن
و الطيبة ليست في السمت
و الادب ليس في ابتسامة صفراء
القتل هو القتل ، و الشماتة سوء ادب ، و النزع للفرقة و النيل من مؤسسات الدولة عدم حكمة ، .......
ربما تبقت عقول لمراجعة النفس و اصلاح تشوه المفاهيم .

- اقسي قرار في حروب الاستنزاف علي الدولة و علي الشعب كان تهجير سكان مدن القناة ، تسيب دارك و اهلك و جيرانك و امالك و ذكرياتك حتي تنجو بحياتك.........................ما اقسي ما يحدث من تهجير الان للمسيحين في العراق الموصل علي يد داعش ................الفرق ان سكان مدن القناة كانت الدولة وكل الشعب في ظهرهم و امل الجميع النصر ..........منتهي الاسف علي حقوق الانسان و اولها ان يعيش الانسان حيث اراد و حيث عاش و مات اهله و اراد ان يموت هو .......

-  الدعوة للدين الدعوة لحقوق الانسان او المرأة ........اي قيمة يتكلم فيها الناس اكتر ، لاحظ انها تنهار اكتر ....................ما تتكلموا عن الفساد شوية يمكن ينهار من النميمة .

- مين وصل الامر ان علي المصري اما ان يحزن فقط علي اهل غزة اللي بيضربوا من اسرائيل ، او ان يحزن فقط علي شهداء الوطن من هجوم جماعات ارهابية ...............لا اختيار في الاحزان و لا الالام ........

- لا اعتقد ان التهجير الذي يحدث لمسحيي العراق في الموصل سيتوقف عند مجرد دفعهم لقسوة ترك بيوتهم و احياءهم التي تربوا فيها ..........الامر سيتطور لتكوين كيانات لدولة مسيحية داخل العراق ..........انهم يفككونها تفكيكا ..........و الخطر ليس علي العراق فقط ......فلنحذر العداوات المصطنعة بين الشعب الواحد و لنحذر السكوت علي الظلم و لنحذر الابتعاد عن اندماجنا كشعب بالابتعاد عن بعض او تكوين كيانات او كنتونات منفصلة .........بدءوا بالسنة و الشيعة و الان المسيحين .......

- مجرد رأي في كامب ديفيد
هل نصر اكتوبر ادي للسيطرة الكاملة علي سيناء / و هل الدول العربية كانت تستطيع ان تدعم مصر لمدة اطول / ام كانت ستفقد مصر النصر و فوائده و لن تحصل علي سيناء ابدا و كان نصر اكتوبر سيعتبر مجرد معركة انتصار في ظل عدد من معارك حرب ادوات سلاحها موازنتهاها تجاه اسرائيل المساندة بامريكا بدول الغرب التي تسيطر علي الدول العربية / الحقيقة ان من الانصاف للمشاهد و المتابع للتاريخ ان كامب ديفيد كانت افضل الحلول لارجاع الارض في حينها و الا كان الامر تحول لبكائيات الجولان و سوريا التي لم تستطع استرجاعها رغم سهولة ذلك عسكريا و رغم ان سوريا اخذت اتجاه الصف العربي و المساندة العربية المزعومة و لكن قوي العرب لن تقوي في المقاومة امام تغول استعمار الغرب و الياته / استرجاع سيناء كان هاما / النقطة المفقودة في كامب ديفيد هو مرور 30 سنة من الهدنة و السلام دون عمل و تقوي و انتاج ...........و لو كان " كما هو كان مفروض " عهد مبارك ان يكون عهد بناء لمصر كما يحدث في ماليزيا او سنغافورة ........كان الامر علي ارض الواقع تغير تماما ........لانه سيكون لمصر المتطورة سيطرة اكبر في المنطقة و ليس سيناء فقط .......و لكن ما حدث من فساد و عدم نمو اقتصادي افضل جعل السباق بين القوي ( رغم استرجاع سيناء ) ليس في مصلحة مصر ...........من الانصاف ان نفهم حركات و قرارات تاريخية تؤخذ في وقتها و ليس احلام و اهداف عامة ........

- لما تشوف حد اسرائيلي يطلب منك الصداقة علي الفيس بوك طبعا حتتصدم و تتخض و يصيبك افكار ليست في صالحة علي الاطلاق ..........لما يتسرب صداقته للعديد و تجد انه ممكن تسمع كلامه علي فيديو او تقرأ البوستات بتاعت بس انت محافظ علي افكارك و بتسخر من كلامه ..........مع مرور الوقت بيتحول لصديق مختلف معاه في الرأي زي اي واحد مصري او عربي اخر في وجهات النظر .......بل تراه علي قناة الجزيرة بتلمعه كصاحب رأي اخر ............الخطورة تكمن في تقبل وجوده و تقبل صديق عسكري صهيوني تتبادل معه الاراء و لو مختلفين منتهي التطبيع بدون مقابل الا القتل و الاحتلال ..............هذا ما يفعله أفيخاي أدرعي و غيره !!!!!!!!!!!!!!!!!!

-  اهم سؤال في امتحان بكالوريوس الطب و الجراحة الان مفروض يكون
الاستاذ : و انت يا بني لو قررت للمريض عملية و داخل اوضة العمليات ايه اللي حتعمله ؟؟؟؟؟؟؟؟؟
الطالب اولا : اعمل اتفاقية عدم اعتداء من اهالي المريض ...............الخ
الاستاذ : هايل يا بني ..........انت الظاهر كنت بتحضر محاضراتي ( كيف تستمر طبيبا جزءا واحدا بعد كل عملية )..........

-  قالك ايه ...........جيش مرتزقة ........هو في جيش مرتزقة المجند فيه بياخد 250 جنيه في الشهر .........انت عبيط يا بني !!!!!!!!!!!!!!

- التطرف يبدأ بسوء الظن بالاخر ..........ثم تنمو عداوة تجاه مجرد تواجد الاخر او اي لمحة منه او حتي صمت او جهل ...........

- هو ايه نظام الامم المتحدة و الفاتيكان و جمعيات حقوق الانسان من تهجير مسيحي الموصل في العراق .......و لا طالما خطة التقسيم شغالة يسقط الدين و تسقط الاخلاق و تسقط الانسانية ............و لا يمكن ان تدعي اي من هذ المنظمات الضعف او قلة الحيلة ؟؟؟؟؟؟؟؟؟؟؟؟

- مش كل حاجة نقول مؤامرة
ايه يعني لما شوية جهلة لا بيعرفوا في السلاح يبقي معاهم احدث الاسلحة
ايه يعني لما مفلسين و مطاردين من الحكومات يشتروا احدث الاسلحة ووسائل الاتصال و يهزمواا الحكومات
الموضوع مش مؤامرة
ايه يعني لما طالبان في افغانستان زمان يهزموا المجاهدين الافغان اللي غلبوا الاتحاد السوفيتي
ايه يعني لما تطلع ناس مالهمش اي موقع من الاعراب يهزموا الجيش العراقي والسوري و يهددوا الخليج
اوك لا في مؤامرة و لا تقسيم علشان ما نخيبش و لا نجيب خيبتنا و فشلنا في حد
طب  ممكن حد يفسر الناس دي بتصرف منين علي الاسلحة و التدريب لدرجة هزيمة الدول !!!!!!!!!!!!!!!!!!!!!

-
هناك من يخاف حتي يمنعه خوفه من المقاومة و يتقمص شخصية عدوه و يري في هزيمته او حتي موته علي يد المعتدي امر طبيعي
............و هناك من يدفعه خوفه لاستجماع كل قوته و استحضار كل قواه المنهكة و استجماعها للقضاء علي المعتدي المخوف قتال القتلة ............نصيحة لداعش التتار كانت نهايتهم في عين جالوت علي يد الجيش المصري ........قرفتونا بقناع الخوف و دبح الاطفال و الضعفاء و قطع الرقاب ........نهايتكم معروفة .

- بالنسبة لموضوع داعش و الابقار ..........علي فكرة بالنسبة لحلب اللبن من الجاموسة "طالما في بابليك و ما فيش فيلينجز يبقي ما فيش مشكلة"......!!!!!!!!!!!

- سيبكوا من المؤامرة و خليكوا تنفيذيين و ديروا الازمة .........و اذا كان هناك من يتأمر و يضحك علي الناس ، قربوا انتم من الناس و فهمومهم و لا تثيروهم و تصبحوا جزء من تنفيذ المؤامرة ببطئكم و انظروا للعدل و لاحتياجات الناس ......و لا تكتفوا بالناس اللي حولكم فقط و لكن اجعلوا هدفكم الشعب كله .

- ماشي اسرائيل بتعمل جرائم شرف و حرب ..........الامم المتحدة بتعمل ايه ........بتصحح لها "كراسة المجهود الشخصي " للحرب .....تدخلوا يا بني ادمين ، اعملوا دوركم و انقذوا الانسان .

-  مشكلة ان يكون فكرنا ....

ان "الموت " عقاب ......و ان "المرض" سوء خاتمة .........

- مش عارف ليه لما عمك مشعل رفض المبادرة المصرية ..........حسيت انه كسر بخاطرنا و وشنا بقي منه في الارض .............هو مين اللي محتاج لمين !!!!!!!!!!!!!

-  كيف نلوم من يقاوم احتلال ارضه ........و نبرر لمن يقمعه .........اسرائيل تقوم بحرب ابادة للشعب الفلسطيني.

- بيقولك اوباما عايز ينزع السلاح من الفلسطينين لحل الوضع في غزة ؟؟؟؟؟؟؟؟؟............سلاح ايه اللي حينزعه فين السلاح ده !!!!!!!!!!! ..........في ابادة واضحة للفلسطينين .

- في الاربعينات من القرن الماضي .........قام الشباب المصري بهجمات فدائية علي قوات الانجليز المتمركزة في منطقة القناة ...........هل كان من الانصاف ساعتها ان نلوم هؤلاء علي محاولتهم لتحرير بلادهم بدعوي ان الجيش الانجليزي المنتصر في الحرب العالمية الثانية يمكنه ببعض خطوات الاستيلاء علي القاهرة و الاحتلال الكامل لمصر و ان ما يفعلوه ما هو الا ضربات تضع الوطن في خطر ..........لا يمكن لوم من يحرر بلده و نترك المحتل و المستعمر ؟؟؟؟؟؟؟؟؟

- لو كان السيلفي مش صورة و بس و كان يبين النفس و الضمير من جوه ..........كان في حاجات اتغيرت في انستجرام LOL

- تحول العيد عند البعض الي بكاءيات كربلائية تتمني مهديها المنتظر .

- اسهل حاجة دلوقتي ان لما حد يختلف معاك ............يتهمك بالجهل او الكفر او الخيانة او يشتمك من المنقي !!!!!!!!!!!

- موضوع 23 مليار جنيه حشيش في السنة ...........طالما حصرناهم ، يا نمنعهم يا نأخد ضرايب ..........و لا احنا بنعمل احصاءات و ابحاث علمية .........

- "الفلول " ..........معترضون علي مقتل السيدة الاولي !!!!!! LOL

-  الناس فهموا " البحث عن الذات " ...........انهم ينقذوا نفسهم علي حساب الاخر و  الوطن !!!!!!!!!!

- الاخطاء تدعو الانسان اما ب شهوة او تبرير .

ليست هناك تعليقات: