الجمعة، 27 ديسمبر، 2013

كلمات عن الثورة – 29


في يوم من الايام ، سيدرس احفادنا التاريخ ، و سيعرفون مدي جهلنا و تكبرنا في الاختلاف ، و تسمي هذه العصور بعصور الظلام .......هل علينا ان نكتب تاريخ مهين .......ام نختار كتابة تاريخ مشرف ، يفخر به احفادنا و نكون علامة و بداية لعصور التنوير ........علينا ان نقرر و نختار و نفعل .


" تركيا "كانت تسعي لان تكون " امبراطورية " مرة اخري ..........و " قطر " كانت تريد ان تكون " الحي الاول بمدينة نصر " مرة اخري........برضه توسع .


بغض النظر عن اي شيء .......الشماتة شعور حقير ......



في الاول احتكروا الاسلام لانفسهم .......لما فشلوا في ذلك .........الان يخطفون الانسانية و يحتكروها ..........!!!!!!!!!!!!!!!!!!


الانتماء دائما انحياز .........و انا منحاز "لمصر "......ربنا يحميها .


احتكار حق القتل و تصنع البراءة ..........فن الاستعباط .


كلمة "انا مش اخوان" اصبحت تظهر مرتين .......مرة لما حد يتكلم بوجهة نظر الاخوان و يقولها / و مرة لما حد من قيادات الاخوان يتمسك يقولها برضه !!!!!!!!!!


بعد اخبار القبض علي " وجدي العربي " ........" الباشا زكي رستم " يتهم امال ، فاتن حمامة " بعدم المتابعة الجيدة للطفل وجدي العربي ،و تركها له ينخرط في الاخوان المسلمين ، قاصدة ان تحرج الباشا "زكي رستم " امام اعداءه السياسين ...........

الجزيرة و الخيال .

لب " الكرامة " في "الاستغناء" ، و الكرامة الحقيقية و العملية في " الاستقلال عن الاخر"..........و الحاجة للاخر دون تبادل احتياج اهدار لها .......بين البشر و الدول .





المستشار عدلي منصور ، رئيس مؤقت ، هو رجل دولة له مهمة معينة في فترة انتقالية ، لم يقدم نفسه كسياسي او بنموذج انتخابي .......لا انتظر منه كاريزما او مواقف سياسية ايديولوجية ، لان ادارة البلاد تتم بالفعل من خلال التزامات المرحلة الانتقالية ........لا داعي لتحميل الرجل اكبر او اكثر مما هو مطلوب منه ، المطلوب فقط هو نجاحه هو الحكومة الانتقالية في وضع الدستور المناسب و الانتخابات الرئاسية و التشريعية .....



اللي عايز يبقي مع الشرعية ، لازم يفهم

ان الشرعية فعلا ان الشعب ينتخبك علي اساس معين انت راضي بيه و الشعب راضي بيه .

ان الحنث بالقسم الرئاسي علي دستور معين ، لا يكفي فيه كفارة صيام 3 ايام . و هو بداية مخالفة الشرعية .

انك تعمل اعلان دستوري محصن ( ضد المية و ضد الفار و ضد اي شيء .....) ، ده اسمه انتهاك للشرعية اللي انتخبك علي اساسها الشعب .

انك تسكت و تغض الطرف عن حصار المحاكم و تعطيل متظاهرين تبع اتجاهك ، و تتمرس بيهم في خلاف مع القضاء ، انتهاك للشرعية و قسمك .

انك تمكن مجلس الشوري المعين في معظمه لاصدار قوانين ، غير شرعي .

انك تصر علي اصدار دستور و عمل استفتاء باشراف قضائي مشكوك فيه ، و قطع النور و تعطيل الية الانتخاب لتمكن اتجاه معين فقط بالمشاركة ، غير شرعي .

انك لا تري الملايين الموقعين في حركة تمرد ، و تراهم مهرجين و انهم غير قانونين منتهي الاستخفاف بالشرعية .

انك لا تري ملايين الشعب في 30 يونيو ، منتهي الانكار لشرعية الشعب .

انك مصمم ترد بالعنف علي ملايين الشعب الي رفضوك ........ غير شرعي و عنيف و للاسف ارهابي .......

راجع تفكيرك ، و انسي مرسي و افتكر مصر و بس .

موضوع التحصين ده متفبرك ............لان اصلا ( من التجارب السابقة للرؤساء و الملوك و ووزراء الدفاع و الداخلية ) ما فيش حاجة اسمها تحصين ، التحصين الوحيد هو رضا الشعب و مدي تأييد الجماهير من عدمه .........

كل السياسين في العالم يحاولون جذب الاخرين بالخدمات او بالنفاق الجماهيري او بالخداع ........عمري ما شفت سياسين عايزين يقهروا الاخر ليكون معهم و يسبون و يكفرون و يقللون من شأن الاخرين .......هو فعلا الاخوان عايزين يرجعوا مرسي او ينادوا ياي حق ليهم .......طرقهم منفرة لا تحمل علي اي تعاطف ؟؟؟؟؟؟؟؟طريقة غريبة صحيح ..........

كل شيء مشكوك فيه التاريخ بيحكوه لنا من وجهة نظر المنتصر ، و العلم نظريات محتاجة لاثبات ، و السياسة كذب و خداع ..........الحاجة الوحيدة اللي ما فيهاش شك ، الروايات الخيالية !!!!!!!!!!!!!...........يالا..... ربنا موجود .

طلبة بيشتموا بالاب و بيرفعوا الجزمة لاساتذتهم و بيولعوا شماريخ في الجامعة و يعطلوا ممارسة مناقشة علمية للماجستير .........عايز مبررات و ناس تشجينا بالاسباب للتعاطف و للتعمية عن ما حدث و نراه و كأنه كفاح ........علي الدولة تربيتهم و ليس معاقبتهم .......التربية من جديد لمن سقطوا من دور الدولة ......ارشاد اهلهم للتداخل و توجيه .........و اذا رفض الاهل و ابناؤهم من الطلبة التغير و الانصياع لشرط العلم و التعلم في الجامعة ، للاسف علي الجامعة ان تتخذ قرار انهم لا يستحقون العلم و لا التعليم .

بعد ما حدث في كلية دار العلوم ، من طلبة الاخوان مع الشيخ علي جمعة .......فعلا الجامعة مش محتاجة لامن و ظبطية قضائية .........دي محتاجة محكمة جوة الجامعة ........ينفع كده !!!!!!!!!...........الناس حتعلم ولادها فين بس ، مش كفاية مستوي الجامعات ، كمان يتجول فيها البلطجية .........

حان الوقت لعمل اكبر من مجرد وصف الثورة و الاحداث المصاحبة لها ، البحث عن الهوية ، ..... علينا تحديد اهداف و اليات تنفيذية للمتغيرات في الرؤية و المفاهيم . ...........زهقنا من فلسفة الكلام كالروائين ......... و الا ستتحول الثورة لفيلم ابيض و اسود رومانسي يحمل ذكريات جميلة بدون اي مردود علي الواقع .......فقط لا غير .


اسهل فرق بين الديمقراطية و الدكتاتورية

الديمقراطية تحتاج للجماهير و تتعامل مع الجماهير و يشترك في سير الامور الجماهير ، فتجد الوجوه المتحكمة في الامور تتغير و تتبدل في اطارات و اتجاهات و مجموعات مختلفة .

الدكتاتورية تتكلم عن الجماهير و تستعمل الجماهير ، فتجد الوجوه المتحكمة في الامور هي هي لا تتبدل و لا تخرج من اطار و مجموعة معينة

كمية القتل و سفه الاختلاف و البعد عن اي خطوة لحقن الدماء و الدفع بالغلابة لتحقيق مصالح الكبار ينبأ ..........بأننا في اخر الزمان ، و لن استغرب ظهور المسيخ الدجال او الدابة و يأجوج و مأجوج الان .!!!!!!!!!!!!!!


هو الطلبة في الجامعات ، بيحاربوا .......و بيحاربوا مين؟؟؟؟؟؟
و في حالة لو انهزموا حيحصل لهم ايه
و لو انتصروا ..........حنفقد الجامعات و هيئات التدريس !!!!!!!!
في العراق بعد الفوضي فقدوا المئات من اعضاء هيئة التدريس بسبب الفوضي و الفتنة
و فقدت العراق ما لن تستطيع تعويضه الا بعد مائة سنة
الحماية للعلم و للجامعات و لاعضاء هيئة التدريس و للطلبة اللي عايزين يتعلموا
غير كده غير مقبول و استعباط .
لو انت اهبل حتصعب علي الناس و يعطفوا عليك ........ بس خلي بالك ،حتستهبل اكتر حتاخد علي قفاك

ما هو لو كل واحد عيل عنده 17 سنة و لا اصغر من "كده "، ادينا له سجن 10 سنوات و "كده".......يبقي احنا مخنا صغير و بنعاقب المجتمع و بنعد مجرمين و تكفيرين في السجون و بنرجع لنفس المربع الاول و هو "المواجهة الامنية فقط ".......في طرق اخري اكيد .....لابد من اعادة تربيتها و برمجتها ليستفيد منها المجتمع حتي لو استمروا نفس مدة السجن و لكن في مؤسسات تأهيل و تعليم و تدريب للسلوك و العلوم و الحضارة .

الثورة تغيير ساخن حاد من المؤكد ان له ضحايا .....و هناك دائما طرق التعليم و التدريب و الانظمة الحديثة للادارة و محاصرة الفساد للتغير البارد الناعم .

في الحياة التغيير مستمر و ثورة اليوم شيخوخة الغد و رجعيته ........اصل الامر في الاتفاق علي اليات و نظام التغيير ....و الا اصطدمنا بموجات تغيرات عنيفة كل نصف قرن .

علينا ان نعلم الجيل الجاي اساسيات علوم الفلسفة و القانون و الاخلاق و السلوكيات .......الاوطان ترقي بالعلم المتربي .

المتابع لطرق كتابة الدساتير في مصر : من كتر ما احنا مش واثقين من بعض ، بنكتب و نتناقش في تفاصيل التفاصيل في الدستور بالكلمة !!!!! ..........ناقص بس نكتب اسامينا للتأكد و نحط شرط انه حيتنفذ علينا و علي ورثتنا ؟؟؟؟؟؟؟؟؟؟

" مش حتبطل الحركات و الكلام ده ضيعتونا " ..........كلمة سيقولها الجيل القادم لناشطي اليوم و كل من فضل اداء "دور الثوري" عن اداء دور من "يعمل و يبني "..........كل ما هو جديد و ثوري اليوم ان لم ينتج عنه خطوات للامام لن يكون سوي " رجعية " في المستقبل ........الاجيال تحاكم بعضها ، عسي ان تكرمنا الاجيال القادمة و لا تتهمنا بالسذاجة و الطيش و ربما بالخيانة للوطن و لمستقبلهم.

العلمانية الشاملة و الهوس الديني في مواجهات و مفاضلات ، و لم تكن ابدا من موازنات هوية مصر .......و لكن الناس مغلبة نفسها .

علينا ان ننتقل من "الحالة الثورية " لحالة "النظام و البناء" ...........لو كانت الحالة الثورية نفعت كان كوبا قادت العالم ............

المقصود "بحقوق الشهداء "........هي اللي حياخدوه من اهالي و اصحاب الشهداء !!!!!!!!!!!!

في الايام العادية السلطة قوة و جاه و اختبار للاصل و العيوب .................في الايام العصيبة و الفاصلة السلطة تظهر العيوب فقط ..........

في التجارة : اجهد من تشتري منه بالفصال ، و من تبيع له بالاستغناء ،و اشعر من امامك بأن الوقت طويل و الفرص مماثلة و كثيرة ، و كن متبسما حلو اللقاء و ان الامر صداقة و ليس تجارة .............كذلك في تجارة الحكم التي تسمي سياسة .........و ربنا يرحمنا من التجار و رجال السياسة .

منذ فجر التاريخ و يحل المصريون التحديات بالاحتواء و الوسطية .................تذكر ان "مينا " ملك الجنوب انتصر علي ملك الشمال و شعب مصر الدنيا ( الدلتا ) ...........و لكنه نصب نفسه ملك مصر بجنوبها و شمالها و تقلد التاج الموحد لمصر و المكون من تاج الجنوب و الشمال ...........لم يقل احنا شعب و انتم شعب و لم يقل اهلي و عشيرتي و اهل افريقيا اقرب الي من شعب مصر في الشمال ..............." الملك مينا " لمن يريد ان يفهم مصر .

مشكلة المياة و نصيب مصر من ماء النيل بالتأكيد لها متخصصين يتكلمون عنها ......ما يهمني كطبيب نفسي ،،،،، هو التغير النفسي و الاجتماعي المتوقع في سمات شعب تعود ان مصدر الماء و الحياة حول النيل ، و كيف ان يتحول سمات و طبيعة التفكير و التحرك و التعايش و التماسك و التمسك بالارض و معاني الوطنية و المردود علي الحياة اليومية !!!!! عندما يكون النيل مجرد مصدر بسيط للماء و الزراعة و الحياة بجانب مصادر اخري نبحث عنها ..............بالتأكيد سنتغير و لابد ان نفهم و نتوقع كيف سيكون التغير ، حتي لا نلمس من التغيير الاسوأ و لا نحصد افضل ما فيه.




الناس في مصر يا ترفع الواحد للسما ، يا توديه سابع ارض .......بعد الثورة "مبارك " تقريبا اللي فهمته من التعليقات انه ما حاربش في اكتوبر و غالبا ما اخدش الابتدائية ، " الشاذلي " صانع انتصار اكتوبر لوحده و كمان كان بيدي توصيات لثورة 52 ؟؟؟؟؟........و هكذا بقي كله من ده ..........بالراحة شوية لكل انسان اخطاءه و مزاياه / اذا فعل جرائم يعاقب عليها / و اذا فعل خير نمدحه و لكن لا يمكن ان ننسب له كل خير حدث منذ الخليقة ؟؟؟؟؟؟؟؟؟؟



الاخلاق و القيم مهمة جدا ...............في حكايات الاطفال التقليدية !!!!!!!!!!!!


عارف انت لما جهاز الكومبيونر بتاعك يهنج و تبص له و ما فيش في ايدك و لا تعرف حاجة غير انك تعمله ريستارت و تطلب حد يصلحه لك و انت بتقول في نفسك " فيه حاجة غلط ".........موقفك بالظبط من الكومبيوتر هو ده وضع الثوريين و الاصلاحين من مصر ...................." فيه حاجة غلط و غاليه عليا بس مش بفهم اعمل ايه "
حرق العلم ........اضطراب في الهوية .........نجح البعض في وضع قيم كبري في موضع الاختيار و ادارة صراع نفسي بينها داخل الانسان المصري .......لتحطيم معني الانتماء للوطن او تحويله لكيانات اخري او القضاء عليه و البقاء تائها ...........تحيا مصر و يحيا علم مصر و لا خلاف بين ايماننا بالله و الدين و انتماءنا للوطن .

- نحن ضد الفساد ، بالكلام فقط

في ناس عندها مشكلة نفسية مع السلطة ، فالسلطة عدوة لها باستمرار مهما تغيرت الوجوه و الاتجاهات و الخطط .........مشكلة اسرية بس علي كبير ....!

• سيشرق وجه مصر المتعافيه صبوحة ،و سينعم بدفئها الجميع ........لا يمكن لاحد ان يأسر الشمس او يلونها بالاخضر او اي لون اخر أو يبرد لهيب شعبها ........ انها مصر .

"العامل المشترك الاعظم " في مصر قبل الثورة و بعدها ، من ايام نظيف الي الجنزوري و قنديل الي الببلاوي .........." مشكلة الزبالة " ..........انتصرت علي الجميع !!!!!!!!!!

هو فكرة التقسيم للبلاد العربية ماشية في الامخاخ العربية كده ليه ......هو اي خلاف ، بدل ما نحله و لا نتعايش مع بعض ، نروح لشيل ده من ده يرتاح ده عن ده "علطول ".........اي الضعف و الهوان ده ، و بعدين مستغربين بعد كده الاندلس راحت ازاي و فلسطين ليه مش بترجع ..........بالشكل ده خد عندك ، فلسطين (1) ، (2) ، (3) .........عد بقي يا بتاع التقسيم يا خاين لبلدك .
عادي و من غير ذكاوة جامدة / تطبيق الحد الادني للرواتب مش حيعدل المعادلة الاقتصادية و لا الاجتماعية .......لابد من تطبيق الحد الاعلي للرواتب معه و في نفس الوقت .......طبعا كل الناس فهمه بس النفس و الارادة و شجاعة القرار .

علشان نبقي حقانين ، التلات سنين لازم نحسبهم زيادة في عمرنا ب 30 سنة ........و بكده ممكن نفهم اشياء و ناخد قرارات و الصغير يكبر و المسنين يقعدوا في البيت ..........و جيل الوسط اللي زي حالاتي يدوب يطلع معاش .

ترف المطالبة بسقوط النظام لن يستمر ، و اذا استمر الامر فوضي بهذه الطريقة ستأتي ايام نطلب فيها اي نظام او نشحته و لن نجد سوي الفوضي لسنوات طويلة عجاف ..........علينا ان نتحول في التغير من الثورية الي تغير الافضل للدولة .

ما اراه في الواقع المصري السياسي و الثوري ..........يدل علي تواجد الترامادول في خلفية كثير من الاذهان ، و الترامادول هو عقار من مجموعة الافيونات ، و يتعرف عليه مستخدموه كمضاد للالام و الصداع و مقوي للقدرة الجنسية و الاداء الجسدي ......... يشعر متعاطيه بوهم الاطمئنان و السكينة و يقلل القلق بالتبعية ، قد يصاب المتعاطي بالامساك او فقدان الشهية و الوزن بالتبعية ، و مع الجرعات الاكبر في التعاطي له يصاب الشخص بالتشنجات الصرعية .......بعض المتعاطين يصيبهم اعراض الهلاوس و التوهم المرضي ..........

اللي لاحظته ان هناك حراك سياسي و خلافات و خناقات ........و اكيد حد بيكسب و يمسك المنصب ..........اللي ملاحظه ان ما فيش حد عنده فكره حيعمل ايه بيه ، لكن بيعرفوا يتخانقوا و يشوهوا بعض و يوصلوا له !!!!!!!!!!!!!!!!!!!!

هم كانوا عيلتين ولاد ناس يحكموا و يتحكموا ، عيلة مبارك و عيلة الاخوان ...................و باقي الشعب كومبارس ................طب لو سمحت عايز فلوس لما كنت بتمشي في الميدان و بشاور بالعلم !!!!!!!!!!!!!!!!

برضه لازم نعرف ان الارهاب مش كله وحش ........لانه بيعلمك الحذر و الحيطة ،و ان اتفاجأت اهو لحظات اثارة ،و ممكن سريعا يخلصك من مشاكل الحياة و يدخلك الجنة بطريقة شرعية ..........يالا يا ارهابي منك له ، بطلوا اجرام .

في حاجات لما بتحصل تهزك و تحس انك فقدت شيء فيك ،........شيء و كأنه كائن حي و مات ......ممكن تكون ناسيه و مش فاكره ، لكن هو جزء منك من افكارك مشاعرك ارتبط بأوقات حلوة او حتي اوقات صعبة لكن في مرحلة في حياتك انت بتحبها .......................ممكن الحاجة دي تكون انسان تعاملت معاه مرة واحدة او مدرس دخل مرة واحدة الفصل قال حاجة لفتت نظرك او مكان بدأت فيه العمل .........................شعرت بده لما عرفت الارهاب اللي حصل في المنصورة ، حسيت بغيرة و شعور بالظلم و خوف اني افقد شيء !!!!!!.............المنصورة ،اول مكان اذهب فيه لاستلام تكليفي للعمل بوزارة الصحة ، قعدت هناك 8 شهور ، اكيد ما كانوش أهم فترة للتعليم و العمل ، .............لكن هي كانت اللحظات الوحيدة اللي ببتدي فيها حياتي العملية و العلمية في الطب و مشاعرها و طموحها و افكارها ................كنت فاكر اني مش فاكرها ،،،،،،،،،،،،،ربنا يحفظها و يحفظ اهلها و يحفظ اهل مصر و دايما في استقرار و امن .


ليست هناك تعليقات: